Bergarakoartxiboa.eus

Genealogia

Udal artxiboan sarri askotan genealogiaren inguruan jakingura dutenen bisitak edo posta-mezu elektronikoak jasotzen ditugu. Batzuetan, pertsona horiek ez dute jakin izaten hainbat tokitan garrantzizko informazioa aurkitu dezaketela euren familiari buruzko datu gehiago eskuratze aldera.

Hori dela-eta, zeregin horietan hasten direnentzat aholku eta jarraibide batzuk ematea pentsatu dugu. Ohar honen helburua hauxe besterik ez da: genealogiaren inguruan jendeak egiten dizkigun galdera orokorrenei ematen dizkiegun erantzunak idatziz jarri eta sarean zintzilikatzea. Ez da, beraz, azterketa oso-oso bat ezta zientifikoa ere. Ematen den informazioa, gehien bat, Gipuzkoa eta Euskadiri dagokio.

Zuhaitz genelogikoa

Hasteko, begi bistakoa bada ere, interesatuak gertuen dauzkan ahaideen informazioa bilatzen hastea komeni da (gurasoak, aitona-amonak, osaba-izebak, etab.) Gehienetan jakin badakizkigu datu horiek edo, bestela, etxean dauzkagu (jaiotza-agiriak, heriotza-agiriak, txartel oroigarriak, familia-liburuak); kanpora bizitzera joandakoen kasuan, berriz, inmigrazio- edo naturalizazio-espedienteak daude.

Lana nolabaiteko ordenaz egin ahal izateko, liburu hau gomendatzen dizuegu: F. Borja de Aguinagalde Olaizolaren Gipuzkoako leinuen aztarna bila (XV-XIX) = Guía para la reconstrucción de familias en Gipuzkoa (s. XV-XIX). Liburu hau "genealogiaren gaineko ikerlanetan interesa daukaten pertsona guztiei dago zuzenduta, Gipuzkoan zein Gipuzkoatik kanpo gai honekin zerikusirik duten agiritegietako fondoetako materialari buruzko informazioa aztertu nahi dutenei, hain zuzen. Liburu honek lortu nahi du, gainera, era xume batean baina teknizismoak alde batera utzi gabe, agiritegietako aztertzaileei ikerketa mota horietan laguntzeko eta behar bezala bideratzeko baliabideak ematea."

Gipuzkoa, Bizkaia eta Arabako apezpiku-barrutietan, sakramentuen erregistroak indizatuta daude eta on-line kontsulta daitezke barruti bakoitzeko web orrietan edo, hirurak batera, EASN Euskadiko Artxiboen Sistema Nazionaleko web orrian.

EASN-eko web orri berean beste baliabide batzuk ere kontsulta daitezke. Horien artean BADATOR azpimarratu behar da. BADATOR datu-baseak Euskadiko artxibo publiko nahiz pribatu askotako agirien aipamenak biltzen ditu, eta baita Estatuko artxiboetan Euskadiri buruz dauden agirien aipamenak ere.

Espainiako Kultura Ministerioak, PARES " Portal de Archivos Españoles en Red" programaren bitartez, artxibo-fondo ugariei buruzko datu-baseak ditu kontsultagarri.

Bukatzeko, artikulu bat aipatuko dugu: Fuentes genealógicas en los archivos municipales: el ejemplo de Bergara (pdf; 250 Kb). Antzinako elkarteak argitaratzen duen Antzina aldizkarian, 6. alean, agertzen da. XIX. mendean udal administrazioan dauden iturrietara hurbiltzeko azterlana da, eta Bergara hartzen du adibide.

Ugari dira genealogiaren inguruan dabiltzan elkarteak, banaketa-zerrendak eta foroak:

GenWeb orrian genealogiari buruzko foro- eta zerrenda- erreferentziak aurkituko dituzu.

Anillo de genealogía hispana orriak genealogistentzat informazio, erreferentzia eta aholku erabilgarri ugari ditu; eta horretaz gain, gaiari buruzko baliabideak lortzeko hamaikatxo lotune dago bertan.

Directorio de genealogía hispana orriak hainbat erreferentzia ditu software genealogikoari buruz, hasteko urratsei buruz, etab.

Family Search orrian abizenen araberako bilaketak egin daitezke, geografikoki edo herrialdeka mugatuz.

Foro de Genealogía Hispana Estatuko esparruko Red Iris sareak kudeatzen du.

basque-genealogy (Basque Genealogy research and help) Euskal Herrirako banaketa-zerrenda bat da.

Antzinako Euskal Herriko genealogia-elkarteak kudeatzen duen web-orria da.

Ameriketara joandakoei buruzko baliabideak:

Juan de Garay fundazioa.

Kubara joandako edo Kubatik irtendako bidaiariak CubaGenWeb orrian.

Ellis Island irlara sartutakoen erregistroa (Batzuk, EBetatik sartu ondoren, beste herrialde batzuetara joaten ziren).

Bordeletik irtendako bidaiariak; Amitiés Généalogiques Bordelaises Bordeleko genealogia-elkartearen orrian.

Castle Garden inmigrazioko zentroa (EB)