"Izotz ondoko eguzki" erakusketa ikusgai dago Bergaran, abenduaren 25era bitartean. Euskararen historia soziala Bergaran egitasmoaren baitakoak, 1940tik 1980ra bitartean Bergaran euskalgintzak izandako bilakaera jasotzen du. Ostiralean egin zuten inaugurazio ekitaldia.

Espainiako gerra ondorenetik trantsiziora arte euskarak Bergaran izan duen bilakaera aztertzen da erakusketan. Hala, 1940 eta 1980 urte tartean euskara gorde eta zabaldu dutenen lana identifikatu, aitortu eta ezagutzera eman nahi da. Hainbat dokumentu idatzi eta argazki baliatu dira erakusketarako, tartean Bergarako udal artxiboko funtsak eta baita herritarrek egindako ekarpenak ere. Hala nola, aldizkari, liburu, kasete, eskultura eta abar.

Protagonisten ahotsen bilketa zabal bat ere egin da, gerraostetik 80ko hamarkadara bitarte euskalgintzan jardundakoen testigantzen bidez euskararen historia soziala osatzeko helburuarekin. Guztira 26 elkarrizketa egin dituzte eta horiekin osatutako ikus-entzunezkoa ikusgai jarri dute Aroztegin. Gainera, ostiraleko ekitaldian, errekonozimendu xumea egin zitzaien horiei guztiei.

Egitasmo zabalago baten hasiera izan gura du atal honek eta hala, antolatzaileek azaldu zuten, pozik hartuko dituztela herritarrek izan ditzaketen era guztietako ekarpenak.

Antolatzailea: Bergarako Udaleko Euskara Departamentua eta Udal Artxiboa.

Katalogoa ikusi